- A FEIRA AUMENTA ESTA ÁREA EXPOSITIVA CON NUMEROSAS PROPOSTAS DE TESLA, VOLKSWAGEN, AUDI, MERCEDES, BMW, NISSAN, LEXUS, BYD, TOYOTA, CASTROSUA E VELCA, MOITAS DAS CALES PODERÁN SER CONDUCIDAS POLOS VISITANTES, ADEMAIS DE INFRAESTRUTURAS DE CARGA
- ESTE CERTAME DO SECTOR DA ENERXÍA CELEBRA A SÚA QUINTA EDICIÓN DO 25 AO 27 DE MARZO NA FEIRA INTERNACIONAL DE GALICIA ABANCA
Silleda, 22 de marzo de 2026- A feira de enerxía Enerxétika, a cal celebrará a súa quinta edición do 25 ao 27 de marzo no recinto Feira Internacional de Galicia ABANCA (Silleda, Pontevedra) co patrocinio oro de Red Eléctrica e prata de Serveo, ofrecerá aos seus visitantes a posibilidade de coñecer as particularidades e vantaxes da mobilidade sostible, un ámbito que medra considerablemente na feira en canto a propostas.
Así, a súa área expositiva contará con vehículos eléctricos e híbridos de última xeración de prestixiosas marcas, ademais de infraestruturas de carga. Mostraranse coches de Tesla, Audi, Mercedes, BMW, Nissan, Lexus, BYD, Toyota e Volkswagen, ademais de furgonetas desta última marca, autobuses eléctricos de Castrosua e motocicletas de Velca, podendo probarse boa parte deles nos espazos exteriores do recinto.
Neste sentido, o circuíto de probas da feira permitirá aos visitantes conducir algúns dos modelos de Tesla e Mercedes. Sumaranse da marca Nissan, da que os visitantes poderán probar o novo Micra EV (compacto 100% eléctrico), o Ariya EV (SUV 100% eléctrico) e o Qashqai e-power (SUV híbrido).
Tamén BMW incluirá no circuíto de probas a súa X3 (híbrido enchufable), mentres que Volkswagen fará os mesmo coa súa furgoneta Caddy híbrida.
As motos estréanse no circuíto de probas
A firma Velca, que expón por primeira vez nunha feira galega, tamén poñerá as súas motos ao dispor dos visitantes, que terá a oportunidade de conducir modelos das súas motocicletas 100% eléctricas, como o Vortex ou a One, entre outros. Será así a primeira vez que o circuíto de mobilidade sostible conta coa posibilidade de probar motos.
Ademais, a firma realizará unha presentación o xoves 26 de marzo, na que Emilio Froján, o seu CEO, achegará a súa visión de por onde vai o mercado da mobilidade eléctrica a nivel nacional e mundial.
